«Татмедиа»да газета-журналларга язылучыларга бүләкләр тапшырылды
Бүген «Татмедиа»да «Язылган өчен 100 мең сум, телевизор һәм башка бүләкләр!» акциясенә нәтиҗә ясадылар.
Акциядә Татарстан һәм Башкортстан, Оренбург һәм Ульяновск өлкәләре, Пермь краеннан 691 укучы катнашты. Акциядә катнашу өчен 2026 елның беренче яртыеллыгына «Татмедиа»ның кимендә ике басмасына язылырга кирәк иде.
«Бүген Татарстан - Россиянең иң күп укый торган төбәге. «Татмедиа» холдингы басмалары гына да, күп кенә шәхси басмаларны санамаганда, 170 мең данәдән артык тираж белән чыга. Республика халкы газета-журналларны актив укый. Бу укучылар гына түгел, ә милләтебезнең, җәмгыятебезнең горурлыгы, чөнки нәкъ менә укучы, уйлаучы кешеләр аның киләчәген формалаштыра. Безнең өчен бу зур шатлык. Без укучыларыбызны хөрмәт итәбез һәм яратабыз, шуңа күрә конкурслар уздырып торабыз һәм алар белән ешрак очрашырга тырышабыз», – дип белдерде бүләкләр тапшырганда «Татмедиа» АҖ генераль директоры Шамил Садыйков.
Газета-журналларга язылучылар телевизор, тонометрлар, вертикаль тузан суырткычлар, электр иттарткычлар, шөреп боргычлар, инструментлар җыелмасы, тегү машинасы, автомобиль өчен тузан суырткычлар һәм блендерлар отты.
100 мең сумлык төп бүләккә Балтач районыннан Тәскирә Кашапова ия булды.
Биш һәм аннан да күбрәк басмага язылган рекордсменнар да бүләксез калмады. Алар вертикаль тузан суырткыч, электр иттарткыч, инструментлар җыелмасы, блендер һәм тонометр отты.
Фото: © «Татар-информ», Рамил Гали