Синоптик Шувалов татарстанлыларны тагын буран булачагы турында кисәтте
Юл хезмәтләре Татарстан торак пунктлары ишегалларын һәм урамнарын кардан чистартырга да өлгермәде, төбәккә чираттагы бураннар якынлаша. «Метео» фаразлау үзәге җитәкчесе Александр Шувалов «Татар-информ» агентлыгына шул хакта хәбәр итте.
«Шимбә, 7 февральдә, салкыннар чигенә һәм тагын буран башлана. 7 һәм 8 февральдә 15-20 сантиметр биеклегендә кар явар дип уйлыйм», – дип кисәтте синоптик.
Ул билгеләп үткәнчә, яуган кар бер атна эчендә бераз тыгызланачак, ә аннары тагын бөтен җирне күмеп китәчәк.
«Температура -10 градус тирәсе тәшкил иткәнгә, җиңел, йомшак кар явачак. Нәтиҗәдә, кар катламының биеклеге бер метрга якынаерга мөмкин», - диде Шувалов.