Депутат пенсия алу хокукы барлыкка килү турында алдан хәбәр итәргә тәкъдим итә

Дәүләт Думасы вице-спикеры Борис Чернышов иминият пенсиясенә хокук барлыкка килү һәм түләүләрнең беренчел күләмен күрсәтеп, пенсия алды статусын алу турында гражданнарга мәгълүмат бирү бурычын закон белән ныгытырга тәкъдим итте. Мөрәҗәгать Хезмәт министрлыгы башлыгы Антон Котяковка юлланган, дип хәбәр итә РИА Новости.

Документта билгеләп үтелгәнчә, Россия Социаль фонды гражданнарга ике төп вакыйга турында персональләштерелгән хәбәрнамәләр җибәрергә тиеш. Сүз барлык тиешле ташламаларны аңлатып, пенсия алды статусын алу, шулай ук картлык буенча иминият пенсиясенә хокук датасы җитү һәм аның якынча күләмен күрсәтү турында бара.

Мөрәҗәгатьтә әйтелгәнчә, мондый белдерүләрне «Дәүләт Хезмәтләре» порталындагы шәхси кабинет аша алдан җибәрергә тәкъдим ителә: беренчесе – пенсия алды яшенә җиткәнче алты ай алдан, икенчесе – пенсия хокукы барлыкка килгәнче өч–алты ай алдан. Шулай ук мәгълүматны СМС буенча кабатларга һәм кирәк булганда почта аша җибәрергә тәкъдим ителә.

Чернышов сүзләренчә, хәзер гражданнар үзләренең пенсия хокуклары турында мәгълүматны мөстәкыйль рәвештә соратырга мәҗбүр, бу еш кына түләүләрнең бер өлешен югалтуга китерә. Ул билгеләп үткәнчә, персональләштерелгән мәгълүмат булмау кешеләрнең пенсия билгеләү өчен соңга калып мөрәҗәгать итүләренә сәбәп була.

Чернышов ассызыклаганча, инициативаны гамәлгә ашыру халыкта стресс һәм хокукый билгесезлек дәрәҗәсен киметергә, Социаль фондта процессларны автоматлаштырырга һәм клиент хезмәтләренә йөкләнешне киметергә мөмкинлек бирәчәк.