Марат Сафиуллин: Артига - сыйфатлы белгеч
«Рубин» футбол клубы идарәсе президенты Марат Сафиуллин яңа баш тренер Франк Артиганың билгеләнүен шәрехләде.
«Франк Артига – ул Россиядә эш тәҗрибәсе булган сыйфатлы белгеч. Аның командалары тамашачыларны һәм җанатарларны мавыктыргыч уеннары белән җәлеп итә. «Рубин» футбол клубы яңа тренер белән команданың өй стадионына тагын да күбрәк җанатарлар җәлеп итү өметен тудыра. Франк озак вакыт «Барселона» академиясендә балалар һәм яшүсмерләр командалары белән эшләгән, дөнья футболының күп кенә йолдызларын тәрбияләгән: Ламин Ямаль, Дани Данмо, Марк Кукурелья, Адам Траоре һәм башкаларны. Бу тәҗрибә яңа тренерга «Рубин»да безнең академиядә тәрбияләнүчеләр арасында яңа исемнәр ачарга ярдәм итәр дип өметләнәбез. Яңа тренерга уңышлар һәм алдында торган зур бурычларны уңышлы башкарып чыгуын телим», – дип белдергән Сафиуллин.
«Рубин» белән 49 яшьлек испан белгече арасындагы контракт 2027 елның җәенә кадәр төзелгән. Шулай ук команданың тренерлар штабына аның тагын ике ярдәмчесе Анис Буссаиди һәм Хосеп Техедо керде.
15 гыйнварда Татарстан командасының Төркиянең Белек шәһәрендә яңа тренерлар штабы җитәкчелегендә беренче күнегүләр җыены башланачак.
«Рубин» сезонның беренче яртысы нәтиҗәләре буенча РПЛ турнир таблицасында 23 очко белән 7 урында тора.