Казанда аэропорт юнәлешендә Оренбург трактына охшаш юл төзергә планлаштыралар, шулай ук хәзер Арча юнәлешен карыйлар. Бу хакта Татарстан башкаласы мэры Илсур Метшин журналистлар белән очрашуда сөйләде.
Ул шулай ук «түләүле юл-дублерлар – мәҗбүри ихтыяҗ», дип белдерде.
«Әгәр мин моңа яхшы карыйм дип әйтсәм, киләсе елга яңа мэр эзләргә мөмкин. Тик шулай да яны белән йөри торган велосипед уйлап таба алмыйлар, кытайлар кырые белән парковкага куеп була торган машиналар ясарга өйрәнде. Чираттагы дублер - Оренбург тракты, аэропорт ягына коридор, Арча юнәлеше карала», - диде шәһәр башлыгы.
Метшин белдергәнчә, әгәр Оренбург тракты буенча финанс моделе эшли башласа, киләсе проект тизрәк гамәлгә ашырылачак. Бу берьюлы берничә төзелешкә керешергә мөмкинлек бирә.
«Ә бәя хәзер республиканың Транспорт һәм юл хуҗалыгы министрлыгы, әлеге юл белән идарә итү йөкләнгән оператор белән билгеләнә. Юл буш булачак, беркем дә йөрмәячәк. Шуңа күрә бу базарны җайга салалар. Әмма бу проектның уңышы безнең өчен бик мөһим, чөнки ул вакытта финанс моделе бер үк вакытта бер төзелешкә түгел, ә, әйтик, икесенә – Оренбург трактына да, Дәрвишләр бистәсе аша тимер юл буйлап Арча юнәлешенә дә кыю рәвештә керешергә мөмкинлек бирәчәк», - дип йомгаклады сүзен Илсур Метшин.
