Бүген «Татарстан — Яңа гасыр» телерадиокомпаниясе студиясендә «Яңа ел белән, гаилә» дигән телемарафон баруын хәбәр иткән идек. 12 сәгать дәвамында барган марафон барышы белән «Татмедиа» Матбугат һәм массакүләм коммуникацияләр агентлыгы җитәкчесе Айдар Сәлимгәрәев та танышты һәм Россиядә игълан ителгән Гаилә елы уңаеннан журналистларның бик күп гаиләләрне күрсәтүләре, алар турында язулары турында әйтте.
«Без ел дәверендә зур игътибар белән Гаилә елы турында яздык. Күпбалалы, матур гаиләләр, буыннар чылбыры хакында бик күп яздык һәм күрсәттек. Бу бик матур һәм кирәкле эш, чөнки гаилә — илебезнең нигезе. Киләсе елда да, аннан соң да һәрвакыт гаилә институтын ныгыту өчен эшләрбез. Яңа ел — гаилә җылысында бәйрәм ителә торган бәйрәм. Шуңа күрә дә, мондый телемарафон уздырылуы бик нык урынлы», — диде ул.
Шулай ук әңгәмәдәш үзенең гаиләсенең традицияләре турында да сөйләде.
«Әлбәттә, гаиләбезнең берничә буыны белән бергәләп җыелу традициясе бар бездә. Бәйрәмнәрдә гел бергә. Яңа елны өйдә каршылыйбыз, гадәттә. Гадәттә, туганнар белән 1,2 гыйнварда бергә җыелабыз. Шулай ук Яңа ел алдыннан бер көн өйдә бергәләп винегрет, икенче көнне пилмән әзерлибез», — диде Айдар Сәлимгәрәев.
