Җырчы гаилә Гөлсирин һәм Азат Абитовлар ТНВ-Яңа гасыр телеканалында Гаилә елына багышлап уздырылучы телемарафон кысаларында «Болгар» радиосы студиясендә барган тапшыруда катнашты.
Студиягә алар кызлары Сылу белән килгәннәр. «Киләчәккә планнар бар. Азат белән генә түгел, Сылу белән дә җырсыйсы килә. Сылу җырларга ярата. Быел җырлар да өйрәнде», – диде Гөлсирин.
Алып баручылар Гөлсириннең һәрвакыт тыйнак, сабыр күренүен билгеләп үттеләр. «Тормышта да шундыймы ул?» – дип сорадылар. «Шундый ул, ләкин усаллыгы да бар. Гөлсирин үзе турында: «Мин усал, ләкин явыз усал түгел» ди, нәкъ шулай», – дип уртаклашты Азат.
Азат һәм Гөлсирин, Гөлсириннең әти-әнисе дә кәҗәмөгез йолдызлыгы астында туганнарын әйттеләр. Аңа карамастан, барысы да килешеп, юл куешып яшәүләрен искәрттеләр.
