«Җырлыйк әле» проектын алып баручылар, иҗади гаилә – Динә һәм Илнур Закировлар ТНВ-Яңа гасыр телеканалында Гаилә елына багышлап уздырылучы телемарафонда гаиләнең кадере турында сөйләделәр.
Телемарафонны алып баручылар Закировлардан: «Өйдә дә, эштә дә бергә булып, бер-берегездән туймыйсызмы?» – дип сорады. «Туймыйбыз, чөнки иҗатка, сәнгатькә уртак мәхәббәт берләштерә», – диде Илнур. «Тую дигән төшенчәне, гомумән, белмибез дә. Иҗатыбыз да, гаиләбез дә бергә – башкасына урын юк», – дип кушылды Динә.
Закировлар танышу тарихына да тукталды. Камал театрында «Яшь йөрәкләр» спектакленең репетициясе бара иде, мин сәхнәдә, Динә чокырда скрипкада уйный. Ниндидер сүзне дөрес әйтмәдем дә, шалт күзем чокырга төште дә, Динәнең күзе белән очрашты. Бер күрүдә мәхәббәт диләр бит, шул вакытта күзләр очрашты да, шуннан бирле аерылгысыз без», – диде Илнур.
Закировлар ял итәргә табигатькә чыгарга яратуларын сөйләделәр. Шулай ук туганнар белән дә тыгыз мөнәсәбәттә булуларын әйттеләр. «Туганлык җепләрен өзмәскә тырышабыз. Ике-өч буын туганнар белән аралашам, хәлләрен белешәм. Үземнекен генә түгел, Илнурныкын да», – диде Динә.
Закировлар гаиләнең, өйнең сыеныр урын булуын билгеләп үттеләр. «Эштән соң өйгә кайтабыз – шунда рәхәт. Сәхнәдә эчке халәтебезне күрсәтә алмыйбыз. Шатлык, кайгы киләме – сценарий буенча эшләргә кирәк. Күңелгә җыелган шатлык, сагышны уртаклашыр өчен, гаилә булырга тиеш», – ди алар.
Закировлар ун яшьлек кыз бала тәрбияли. «Бала янында проблемаларны сөйләшмибез. Яклыйбыз, саклыйбыз», –диләр.
