Татарстан Премьер-министры Алексей Песошин республика Хөкүмәте йортында Казанда узачак XIX Россия венчур форумының даталарын игълан итте.
«Форум 2025 елның 9-11 апрелендә узар дип көтелә. Әлеге уңайдан фикер алышуны таләп иткән мәсьәләләр бар», - диде Песошин, форумга әзерлек буенча оештыру комитетының икенче утырышын ачып.
XIX Россия венчур форумы өч көн дәвам итәчәк. 9 апрельдә Иннополиста берничә вакыйга (панель дискуссияләр, визионер лекцияләре, профильле b2b-очрашулар) планлаштырылган. «Казан Экспо» халыкара күргәзмәләр үзәге 10-11 апрельдә форумның мәйданчыгы булачак, анда конгресс чаралары, пленар утырышлар һәм стартапларның питч-сессияләре узар дип көтелә.
Барлык стадияләрдә технологик эшкуарлык һәм венчур инвестицияләренә ярдәм күрсәтү алымнарын үстерү, стартаплар, инвесторлар һәм корпорацияләр арасында яңа партнерлыклар формалаштыру - Россия венчур форумының оештыручылар билгеләгән максатлары әнә шулар.
«XVIII Россия венчур форумы «Технологик эшкуарлык – югары компетенцияләр киңлеге» дигән шигарь астында үтте. Ул үзара тәҗрибә алмашу һәм инвестицияләр җәлеп итүгә ярдәм итеп кенә калмады, ә тиз үсә торган технологик компанияләргә булышуга да игътибар юнәлтте», - дип искәртте Татарстан Премьер-министры.
