Тарих институтының Миркасыйм Госманов исемендәге Алтын Урда һәм татар ханлыкларын тикшеренүләр үзәге җитәкчесе Илнур Миргалиев, «Хан Солтан. Алтын Урда» операсын сәхнәгә чыгаруда катнашып, Казахстан белән хезмәттәшлектән канәгать калуын һәм тагын алар белән эшләргә әзер булуын әйтте. Бу хакта ул «Татар-информ» хәбәрчесенә сөйләде.
Татарстан тарихчысы сюжет төзегәндә лекция укыган, төп консультантлар рәтендә булган. Казахча премьера Алма-Атада Абай исемендәге милли опера һәм балет театрында 29, 30 ноябрьдә, 1 декабрьдә күрсәтелгән иде.
«Аларның эшли белүе ошады. Тыңлыйлар да, сорыйлар да. Мөмкинлекләре, профессиональ белгечләре, матур тавышлы артистлары да бар, идарәче менеджмент та көчле, курыкмыйлар да. Минем шулкадәр игътибарлы, профессиональ иҗат кешеләрен беренче күрүем. Бик тиз башкарып чыктылар. Казахстан бу яктан нык алга киткән», - дигән фикердә Илнур Миргалиев.
Ул операны сәхнәгә чыгаруда катнашкан һәркем үз тәкъдимен әйтүен, ягъни, чып-чын кызыксыну булуына басым ясады. «Кайсы рольнең тавышы нечкәрәк, кемнеке калынрак, киемнәрдә бизәкләр һәм башка детальләрне үзләре шулкадәр дөрес тоемлап, чынбарлыкка туры китерергә тырыштылар», - диде.
«Киләсе сюжетларны да казах тарафы бик эшләргә тели. Тагын тәкъдим булса, Казахстан белән мин эшләргә әзер. Татарстанда тарихыбызны бу форматта күрсәтүдән без әле ерак, кызганыч», - дип белдерде Илнур Миргалиев.
