Аксубай техникумының Хәтер аллеясында махсус хәрби операция зонасында батырларча һәлак булган Сергей Ильин һәм Хөсәен Моратшинга тантаналы рәвештә стелалар ачылды. Бу хакта «Авыл таңнары» яза.
Тантаналы митингка геройларның якыннары, туганнары, техникум шәкертләре, «Ватанга хезмәт итәм» ветераннар хәрәкәте, иҗтимагый формированиеләр вәкилләре, дин әһелләре, якташларыбыз турындагы хәтер кадерле булган барлык кешеләр җыелды.
Район башкарма комтеты җитәкчесе Алмаз Мингулов тантанада чыгыш ясап, Сергей Ильинның хәрби батырлыгын билгеләп үтте.
«Без андый геройлар турындагы хәтерне кадерләп сакларга тиеш, – диде ул. – Бу стела – батырга һәм аны тәрбияләп үстергән гаиләсенә тирән ихтирам күрсәтү», – диде ул.
«Ул район үсеше өчен, шулай ук халык хуҗалыгының төрле тармакларында һәм «Татпотребсоюз» системасында эшчәнлек этапларында үзеннән зур өлеш керткән кеше. Район үсеше чорында да, район кулланучылар җәмгыятенә нигез салынган вакытта да, аның бу юнәлешне үстерүгә керткән өлеше гаять зур», – диде Алмаз Мингулов Хөсәен Моратшинны искә алып.
Митингта ТР мөфтиенең мөхтәсибәтләр белән эшләү буенча урынбасары, көньяк төбәге имам-мөхтәсибе Равил хәзрәт Зөфәров һәм изге Феодосий Тотемский православие чиркәве башлыгы протоиерей Александр Качаев үз Ватаныбызның патриотлары, тарихи хәтер, буыннарның үзара ихтирамы һәм буыннар дәвамчанлыгы турында сөйләделәр.
Стелалардан ак япмалар төшерелде һәм митингта катнашучылар алдында геройларның күңелгә якын образлары пәйда булды. Аларны бер минутлык тынлык белән искә алдылар һәм стелалар итәгенә чәчәк куйдылар.
