Санкт-Петербург шәһәре В.А.Шелгунов исемендәге мәдәният йортында 29 ноябрьдән 1 декабрьгә кадәр Туфан Миңнуллин исемендәге Түбән Кама дәүләт драма театры спектакльләре тәкъдим ителде. Бу хакта Татарстан Республикасының Санкт-Петербург шәһәре һәм Ленинград өлкәсендәге даими вәкиллеге хәбәр итә.
Туфан Миңнуллин исемендәге Түбән Кама дәүләт драма татар театры 1989 елда эксперименталь яшьләр татар театры буларак оеша, ә 2007 елда дәүләт театры статусына ия була.
Театр Россиянең күп кенә шәһәрләрендә уңышлы гастрольләр уздырды, дәрәҗәле Россия, халыкара, республика театр фестивальләрендә катнашты.
Санкт-Петербургта түбәндәге спектакльләр тәкъдим ителде.
«Сүнгән йолдызлар» – татар драматургиясе һәм татар театрына нигез салучы Кәрим Тинчурин пьесасы буенча куелган спектакль.
Тамашачылар шулай ук татар әдәбияты классигы Туфан Миңнуллин пьесасы буенча куелган «Гөргөри кызын бирә» комедиясен карады. Әлеге пьеса керәшен татарларының көнкүрешен, гореф-гадәтләрен ача.
Гастрольләр 1 декабрьдә «Без сагынып килдек сезне» концерты белән тәмамланды.
