Яшь язучы Лилия Закированың «Язылмаган китап» дип аталган яңа китабы басылып чыкты. Китапта язучының яңа повесте һәм хикәяләре урын алган.
«Автор геройлары белән бергәләп «Үз сукмагыңнан ничек тайпылмаска?», «Тормыш төбеннән чыгу юлын кайдан табарга?», «Ата-аналарның балалары язмышын хәл итәргә хакы бармы?» кебек сорауларга җавап эзли. Һәр кеше үз язмышы өчен үзе җаваплы, һәркемнең бәхете үз кулында дигән идея үткәрә», дигән китапның аннотациясендә.
«Лилия Закирова иҗатын балалар өчен хикәяләр иҗат итүдән башлаган иде. Заманында «Яшь ленинчы» редакциясенә хикәяләр китерде. Аның иҗатны ташламавына бик шатмын. Яшь иҗатчыга уңышлар телим», диде балалар язучысы Алмаз Гыймадиев, заманында Лилия Закировага иҗат өчен фатиха биргән кешеләрнең берсе буларак.
