Ульяновск өлкәсенең «Өмет» газетасында Рузия Хәлимованың «Ленин районы татарлары сынатмыйлар» дигән язмасы чыкты.
Ульяновскиның Татар мәдәният үзәгендә Ленин районының Татар теле һәм мәдәнияте көне узды. Район татар автономиясе тырышлыгы белән оештырылган бәйрәмдә яңа өйләнешүче парны, күп балалы һәм 60 ел бергә гомер кичерүче үрнәк гаиләләрне хөрмәтләделәр.
Милли бәйрәм мәдәни үзәкнең фойесында ук башланып китте. Шәһәребезнең 17 нче «Бердәмлек» китапханәсе хезмәткәрләре һәм 242 нче «Искринка» балалар бакчасы тәрбиячеләре әзерләгән күргәзмәләр милли төсмерләргә бай булуы белән аерылып торды. Танылган эшмәкәр Рафаэль Алмакаев бәйрәмгә совет дәүләтенә нигез салучы Владимир Ульянов-Ленин бюстларын алып килгән иде. Аның коллекциясендә данлыклы якташыбызның 180гә якын бюсты саклана икән. Аларның һәрберсе миңа бик тә кадерле, ди ул. Рафаэль әфәнде күргәзмә тирәсендә мәш килүче тамашачыларны экспонатларның тарихы белән дә таныштырды.
Мөхтәрәм кунаклар - шәһәр Думасы рәисенең беренче урынбасары Игорь Крючков, шәһәр хакимиятенең милли һәм дини эшләр бүлеге җитәкчесе Елена Покрова һәм өлкә татар милли-мәдәни автономиясе рәисе Рамис Сафин милләттәшләребезне кайнар сәламләп, җәмәгать эшләрендә актив катнашучыларга Рәхмәт хатлары, истәлекле бүләкләр тапшырдылар.
Бүләкләнүчеләр арасында ана телебез сагында торучы «Өмет» газетасы редакциясенең җаваплы сәркатибе Рузия Хәлимова да бар. Ул шәһәр Думасының Рәхмәт хатын алу бәхетенә иреште. Татар мәдәният үзәгенең яшь, талантлы методисты Назлыгөл Мистякова өлкә мохтариятенең Рәхмәт хаты белән бүләкләнде.
Автономиянең район советы рәисе Котдус Мухаметшин Ленин районы татарларының уңышлары турында горурланып сөйләде. Чынлап та, биредә сокланырлык эшләр байтак. Әлеге район шәһәребезнең төньяк өлешендә урнашкан. Шуңа күрә аны халык «Север» дип йөртә. Биредә унбер меңнән артык татар кешесе башка милләт вәкилләре белән дус-тату, аңлашып яши.
Районда татар телен һәм мәдәниятен, динебезне саклап калып үстерү юнәлешендә сизелерлек эшләр башкарыла. Дистәгә якын мәктәптә һәм 242 нче «Искринка» балалар бакчасында татар теле түгәрәге эшли. 28 нче мәктәп укучылары ана телен фән буларак өйрәнә. Гөрләп эшләп килүче Татар мәдәният үзәгенә һәм 17 нче милли китапханәгә күбесенчә «Север»да яшәүче татарлар йөри. Мөселманнар өчен алты мәчетнең ишекләре ачык.
2024 ел илебездә Гаилә елы буларак билгеләп үтелә. Шуңа күрә милли бәйрәмдә үрнәк гаиләләргә урын түрдән иде.
Бу көнне Татар мәдәни үзәгендә тарихи вакыйга булды. Милли бәйрәмдә саф татар гаиләсе барлыкка килде. Ленин районы ЗАГС бүлеге хезмәткәре Рәмис белән Гүзәл Мезитовларның никахларын рәсми рәвештә теркәп, аларга таныклык тапшырды. Кияү белән кәләш балдаклар алмашканнан соң, гомергә бергә булырга вәгъдәләр бирештеләр. Рәмис белән Гүзәл шәһәрдә туып үссәләр дә, татар телендә иркен аралашалар. Киләчәктә әлеге гаилә телебезне, халкыбызның гореф-гадәтләрен үзләренең дәвамнарына - бала-оныкларына тапшырырлар дип ышанасы килә.
Милли бәйрәмгә 60 ел буе иңне-иңгә куеп, бер максат белән гомер кичерүче бәхетле пар - Иршат белән Камәрия Закировлар да чакырулы иде. Алар 16 апрельдә Бриллиант туйларын билгеләп үткәннәр. Иршат Нуртдин улы Татарстанның Мунчәли авылында, ә Камәрия Әхмәтҗан кызы Чувашстанның Әсән авылында туып үскән. Алар гомер буе Ульяновск өлкәсендә намуслы хезмәт итеп, Хөкүмәт бүләкләренә, Хезмәт ветераны исеменә лаек булганнар. Бәхетле пар өч бала тәрбияләп үстергән. Хәзер инде онык-оныкчылары да буй җитеп килә.
Бәйрәмдә күп балалы үрнәк Шигабутдиновлар гаиләсе дә катнашты. Игелекле, киң күңелле Рөстәм белән Венера дүрт балалары - Аделия, Ринат, Малик һәм Искәндәр янына тагын ике баланы уллыкка-кызлыкка алганнар. Дария белән Марсель яңа гаиләдә ата-ана назын татып, бәхетле балачак кичерәләр.
Бәйрәмне оештыручылар сәхнә түренә күтәрелгән гаиләләргә истәлекле бүләкләр тапшырдылар.
Татар теле һәм мәдәнияте көне күңелле концерт программасы белән дәвам итте.
