Татарстанның халык артисты Зәйнәб Фәрхетдинова Мәскәү Дәүләт Кремль сараенда узачак зур юбилей концертына әзерләнә. Ул тамашачыга карата үзенең мөнәсәбәте турында сөйләде, концертларында бары тик үз тавышына җырлавын әйтте.
«Тамашачының нинди, ничә яшьтә булуына кармастан, мин аны яратып кабул итәм. Аларга булган мәхәббәтем сүнми. Күңелдән башкарылган һәр җырымны һәрберсенә җиткерәсем килә. Социаль челтәрләрдәге статистика буенча мине 25-50 яшьлекләр күп карый. Тамашачы төрле. Тамашачым өчен үзем исән вакытта булдыра алганча тере тавышыма җырлаячакмын», - дип сөйләде ул «Татар-информ» мәгълүмат агентлыгында узган матбугат очрашуында.
Ул концертта яңа дуэтлар булачагын әйткән иде. Аларның берсе Татарстанның атказанган артисты, композитор Марат Галимов белән.
«Мин күптән түгел Омск шәһәрендә булдым, татарлар белән очраштык. Зәйнәб Фәрхетдинованың концерты була, без анда гаилә, дуслар белән барабыз, дип әйттеләр. Башка төбәкләрдән дә тамашачы килә дигән сүз. Зәйнәб апа белән эшләү бик рәхәт, күңелле. Композиторлыкка килгәндә, минем җырларымны беренче башкарган кеше – Зәйнәб апа. «Ике бөртек» җыры белән иҗатыбыз башланды. Минем композиторлык әсәрләремә ышануы җырлавы минем өчен зур дәрәҗә», - дип сөйләде ул.
