Татарстанда энтеровирус инфекциясе белән авыручылар саны арту күзәтелми. Бу хакта «Татар-информ»га республиканың Сәламәтлек саклау министрлыгында әйттеләр.
Энтеровирус инфекциясе сезонлы авыру, бик нык арту очраклары гадәттә июль-август айларына туры килә. Көзен исә, киресенчә, кими. Хәзер табиблар берән-сәрән очрак кына терки.
Бу авыру нигездә җиңел һәм уртача формада уза. Авыруга хас сыйфатлар: температура күтәрелә, аяк-кул, баш тиресенә тимгелләр чыга.
Көзен бу авыруның кимүе Коксаки вирусының түбән температураларны авыр кичерүенә бәйле. Һава температурасы 6 градустан түбән булса, ул үрчүдән туктый.
Шулай да, Татарстанның Сәламәтлек саклау министрлыгы профилактика чараларын сакларга өнди. Кулларны сабын белән даими юарга, җиләк-җимеш, яшелчәләрне дә юып ашарга, кайнаган су эчәргә кирәк.
«Татар-информ» Россия төбәкләрендә Коксаки вирусы ачыкланганнан соң, мәктәпләрдә һәм балалар бакчаларында иртәнге фильтрлар уздыруны тикшерәчәк дип язган иде.
