Татарстан Дәүләт Советы Рәисе Фәрит Мөхәммәтшин бүген Россия Федераль Җыены Дәүләт Думасының Хезмәт, социаль сәясәт һәм ветераннар эшләре комитеты рәисе Ярослав Нилов белән очрашты. Бу хакта республика парламенты матбугат хезмәте хәбәр итә.
Әңгәмәдәшләр социаль һәм миграцион сәясәт өлкәсендә федераль һәм төбәк законнарын гамәлгә ашыру, алдагы чорга федераль бюджетны формалаштыру, шулай ук Татарстанның дәүләт программаларында һәм проектларында катнашуы турында фикер алышты.
Нилов Мөхәммәтшинны VII чакырылыш Татарстан Дәүләт Советы Рәисе итеп сайлануы белән котлады һәм яңа сайланган парламентның депутатлар корпусына уңышлар теләде. Ул үз чиратында Дәүләт Советы, профильле комитетлар һәм парламент комиссияләре, фракцияләр һәм депутат төркемнәре эше турында сөйләде.
Очрашуда шулай ук Дәүләт Советының Социаль сәясәт комитеты рәисе Светлана Захарова, Дәүләт Советы депутаты Эдуард Шәрәфиев һәм Россия Иҗтимагый палатасы әгъзасы Ольга Павлова катнашты.
Ярослав Нилов Казанга эш сәфәре белән килде. Ул махсус хәрби операциядә катнашучы белән очрашырга, Алгарышлы һөнәри әзерлек үзәгендә һәм Цифрлы медицина үзәгендә булырга тиеш.
