Сабир Өметбаев исемендәге Минзәлә татар дәүләт драма театры Казахстан Республикасының Мангыстау өлкәсе Актау шәһәрендә узган III Халыкара «ABISH ALEMI» театр фестиваленнән кайтты.
«Кыргызстаннан, Ираннан, Грузиядән азәрбайҗан театры, Казахстанның Күкшетау каласыннан рус театры, Астана, Алматы, Уральскийданкилгән театрлар белән беррәттән Минзәлә театры да үз спектаклен күрсәтте. Без Флорид Бүләковның «Сөясеңме, сөймисеңме...» трагикомедиясен алып килгән идек», – дип хәбәр итә театрның әдәби бүлек мөдире Нурсибә Адиева. Спектакль Актау шәһәренең Жантурин исемендәге Мангыстау өлкә музыкаль–драма театры сәхнәсендә барган.
«Мәртәбәле казах, совет актеры, СССРның халык артисты, театр һәм кино режиссеры, сценарист, педагог Асанали Әшимов җитәкчелегендәге экспертлар советы һәр спектакльне игътибар белән карап үз бәясен җиткерде. Фестивальнең ябылу тантанасында Татарстанның халык артисты Хафиз Хамматуллин «Иң яхшы ир- ат роле» номинациясендә акчалата бүләкләнде», – диелгән хәбәрдә.
Артист Илдар Халиковка төрки дөнья мәдәниятендәге казанышлары өчен Мангыстау өлкәсе мәдәният, спорт һәм туризм хезмәткәрләре профсоюзларының Күкрәк билгесе тапшырылган.
«Актауда ике меңнән артык татар яши. Актау шәһәренең «Болгар» этномәдәният оешмасы рәисе Фәндәл Сәхибгәрәев һәм шушы оешмага йөрүче милләттәшләр Роза, Гөлнара апалар, Әнвәр абый, Тимур, Эльмира безне очрашуга чакырып, кайнар пылаулы өстәлләр ясап, милләттәшләр белән аралашып утырдык», – дип сөйли театр вәкиле.
Актауда яшәүче татарлар барысы да спектакльгә җыелып килгәннәр. Очрашуда хатыны Галия ханым белән Мангыстау өлкәсенең аксакаллар оешмасы рәисе Онайбек Обдилов та булган.
«Минзәлә театрының Актауга икенче тапкыр баруы. 2018 елда биредә без II Каспий яны илләре фестивале кысаларында Җәвиднең «Иблис» трагедиясе белән катнашкан идек. Ул чакта 100 меңлек шәһәр бүгенге көндә 270 меңлеккә җиткән», – дип сокланып сөйли Нурсибә Адиева.
«Һәр гаиләдә, ким дигәндә, өч бала. Русча эндәшкәч, мәктәп яшендәге балалар: «Казахча сүләш», – ди. Кабатлап татарча әйткәч елмаеп җибәрәләр, телләребез бик якын», – дип дәвам итә ул.
Әле бер ай элек кенә билгеләнгән театр директоры Фаяз Хизбуллин: «Минем театр фестиваленә беренче баруым булганга шулай тоеламы – барысы да безгә уңай, җылы мөгаләмәдә», – дигән, сокланып. Театр ерак сәфәрне оештыруда ярдәм күрсәтүе өчен Татарстан мәдәният министрлыгына һәм җирле иганәчеләргә рәхмәтләрен җиткерә.
