Гаиләләргә ярдәм итү – дәүләтнең эшчәнлегендә иң мөһим өлкәләрнең берсе. Бу хакта Татарстан Рәисе Рөстәм Миңнеханов Дәүләт Советына еллык юлламасында әйтте.
«Ватан көче, җәмгыятебезнең нигезе – традицион гаилә кыйммәтләрендә. «Гаилә бәхете – ил бәхете», – ди халык. Безнең гаиләләр ныграк булган саен, илебез дә ныграк, дигән сүз. Бары тик тату гаилә генә мәдәниятне, туган телне, гореф-гадәтләрне һәм милләтара дуслыкны саклау нигезе булып тора. Илебезнең һәм республиканың ышанычлы киләчәге булган балалар нәкъ шундый гаиләдә тәрбияләнә», – дип ассызыклады Рөстәм Миңнеханов.
Мисал буларак ул хезмәт династияләрен китерде. Генерал-майор Бородин гаиләсе, династияләре белән табиб булып эшләүче Мушарапов-Зариповлар, укытучы Сабировлар, КАМАЗда хезмәт куючы Гайфуллин-Сафиннарның династиясе, Шәрәфиевләрнең спорт династиясе искә алынды. Рөстәм Миңнеханов аларга рәхмәт сүзләре җиткерде.
