Махсус хәрби операциядә катнашучы, Актаныш районы Бүләк авылында туып-үскән Илдар Даутов 30нчы аерым гвардия мотоукчылар бригадасы командирыннан Татарстан Рәисе Рөстәм Миңнеханов исеменә Рәхмәт хаты алды.
«Махсус хәрби операциядә катнашуның беренче көннәреннән үк ул үзен намус белән Ватанны саклаучы ышанычлы сугышчан иптәш итеп күрсәтте», диелә хатта. Бу турыда «Татар-информ» яза.
Шулай ук билгеләп үтелгәнчә, Илдар Даутов төрле хәрби бурычларны үтәгәндә үзен батырларча һәм лаеклы тота, коралы белән ышанычлы идарә итә һәм башка хәрбиләр өчен үрнәк булып тора.
«Нәкъ менә шундый характерлы кешеләр ярдәмендә безнең ветераннар фашистлар армиясен сындырды, димәк, без дә нацизмның яңадан торгызылуын туктата алачакбыз!» - диелгән Рәхмәт хаты текстында.
2 сентябрьдә Татарстанда Россия Саклану министрлыгы белән контракт төзүчеләргә 2 миллион сумга кадәр акча түләнә. Акча күләме арту республикада түләүләр күтәрелүгә бәйле.
Фото хәрбинең архивыннан.