«Алтын минбәр» Казан халыкара мөселман киносы фестиваленең Халыкара кинопроектлар питчингында Иран сценаристы Җәвид Собханиның «Ак ат» проекты җиңеп чыкты.
«Җиңүче фильм төшерергә ярдәм буларак 500 000 сум алачак», дип хәбәр итә кинофестивальнең матбугат үзәге.
«Комиссиянең нәкъ менә минем проектны сайлавына сөенеп бетә алмыйм. Коллегаларымның нинди җитди проектлар тәкъдим итүен искә алып, мин зур җаваплылык тоям. Жюриның ышанычын аклау өчен бөтен тырышлыгымны куячакмын», дигән Җәвид Собхани.
Әлегә фильмны төшерәчәк команда расланмаган. Сценарист картина мөмкин кадәр чынбарлыкка якынайсын өчен, Россия, аерым алганда, Татарстан кинематографистларын җәлеп итәргә хыяллана.
Булачак фильмның сюжеты Мәскәүдә журналистикада эшләүче яшь кыз тарихына бәйле. Кыз бала әнисенең иран татары белән никахына бәйле серләрне ачарга омтыла. Җавап табу өчен Россиядән Иранга юл тота. Әтисенең революцион үткәне аша мәдәниятләр үрелгән дөньяга каравын һәм үзтәңгәллеген ача.
Быел сайлап алу комиссиясе 30 илдән килгән 106 гаризаны караган. Халыкара питчинг финалына Россия, Кыргызстан, Иран, Төркия, Әрмәнстан, Пакистан һәм Бангладештан 12 сценарий үткән.
Жюри питчингның өч фаворитын билгеләгән булган. Болар – Айнур Дәүләтовның «По дороге домой» анимацион кинопроекты сценарие һәм Роман Королевның «Албасты» фолк-хорроры. Икесе дә Татарстан егетләре.