«Алтын минбәр» кинофестивалендә катнашучылар урнашкан «Нугай» кунакханәсендә жюри командасы белән матбугат конференциясе узды. Бу турыда «Татар-информ» хәбәр итә.
Татарстан башкаласына сәфәр жюри әгъзаларының күбесе өчен беренчесе булды. Аларның һәркайсы Казан урамнарындагы «тынычлык һәм тәртип» атмосферасына игътибар иткән. Иран режиссеры Хуссейн Мохсен Дуач килер алдыннан Казанның тарихын һәм мәдәниятен тирәнрәк белеп өлгергән һәм шәһәргә килгәч күп тәэсирләр алган.
«Мин үземне бу шәһәрнеке итеп тойдым. Миндә аңа карата мәхәббәт уянды», - дип уртаклашты Дуач.
Малайзия режиссеры Эсма Даниэл моңа Казанда иртәнге беренче йөгерү вакытында инана. Оман режиссеры Хумайд әл Амри, гарәп әйтемен искә төшереп, «күрү ишетүгә караганда яхшырак дигән сүз» дип белдерде. Хәзер ул Татарстан башкаласын күрде һәм «аның чынбарлыкта нинди булуы турында сөйли ала».
Жюри әгъзалары, кинофорумны оештыру дәрәҗәсен ассызыклап, җитди һәм җаваплы хөкемдарлыкка әзер булуларын белдерде. Күпләр өчен «киносудья» роле яңалык түгел. Жюри рәисе режиссер Метин Гюнай хөкемдарлыкның упкын өстеннән чыгу кебек үк «бик куркыныч» булуына игътибар итте. Дөрес булмаган карар бу упкынга төшү белән чагыштырырлык.
Кинофестиваль 20 ел үткәрелә һәм елдан-ел яхшыра гына бара, дип ышана Гюнай. Юбилейга сайлап алу комиссиясе тамашачыга иң күренекле картиналарны гына тәкъдим итәргә тырышты. Судьялар фильмнарның бер өлешен үз өйләрендә карарга өлгергән, электрон почта аша картиналарның күчермәләрен алганнар. Метин Гюнай аларның барысы да «бик уңышлы» дип билгеләп үтте.
«Барлык фильмнар да бик уңышлы, шуңа күрә ярыш бик авыр булырга мөмкин», - дип өстәде Гюнай.
