8 сентябрьдә, Татарстан Дәүләт Советына депутатлар сайлау көнендә, Әлмәт кешеләре җәмәгать транспортында бушлай йөри ала. Моннан тыш, һәр сайлаучы шәһәрнең 21 оешмасына ташлама ала алачак, алар - кафе, ресторан, ягулык салу станцияләре, спорт комплекслары, бассейн, кибет һәм күңел ачу үзәкләре.
Шулай ук Әлмәт Картиналар галереясенә, Туган якны өйрәнү музеена, «Нефтьче» мәдәният йортының кышкы бакчасына, Габдрахман авылындагы «Батыр» боз сараена бушлай бару, «Кванториум» балалар технопаркына экскурсияләр, шәһәр китапханәләрендә һәм сәнгать мәктәбендә мастер-класслар үткәрү мөмкинлеге биреләчәк.
Музей күргәзмәләрен бушлай карау һәм 8 сентябрьдә җәмәгать транспортында бушлай йөрү өчен тавыш биргән әлмәтлеләргә махсус беләзек алырга кирәк. Аларны сайлау участоклары янындагы мәйданчыкларда волонтерлар тарата.
Шулай ук «Креатив процесслар фабрикасы» мәйданчыгында экология фестивале уза. Биредә кыр кухнясы, ярминкә, концерт, мастер-класслар оештырыла. Моннан тыш, 7 сентябрьдә узышта катнашкан укучылар пластик капкачларын һәм үз беләзекләрен брендлы рюкзакка алмаштыра ала. Акциядә ата-ана сайлау участогында алган беләзек буенча катнашырга була.
Фото: © Әлмәт районы матбугат хезмәте
