Кичә Камчаткада югалган Ми-8 вертолеты һәлакәткә юлыккан, коткаручылар һавадан аның ватыкларына тап булган. Бу хакта Россия Гадәттән тыш хәлләр министрлыгы хәбәр итә.
«Һавадан элегрәк югалган вертолетның ватыклары табылды. Алар экипаж соңгы тапкыр элемтәгә чыккан урын тирәсендә 900 метр биеклектә ята», - диелә ведомствоның телеграм-каналында.
Оператив хезмәтләрнең мәгълүматларыннан күренгәнчә, вертолет туристларны утыртып очып киткәннән соң озак та үтмичә радарлардан юкка чыккан. Камчаткада югалган Ми-8 вертолетындагы кешеләрнең барысы да һәлак булган дип фаразлана, дип хәбәр иттеләр РИА Новости агентлыгына ашыгыч хезмәтләрдә. Ми-8 һәлакәткә юлыккан урынга Россия Гадәттән тыш хәлләр министрлыгының вертолеты юл тоткан. Белгечләрнең авария-коткару эшләре алып бару өчен кирәкле барлык җиһазлары да бар, дип өстәделәр ведомствода.
Һава транспортын файдалану һәм хәрәкәт иминлеге кагыйдәләрен бозу турында җинаять эше кузгатылган.
