Яңа Чишмә районы Кызыл Октябрьдән көмеш волонтерлар Елена Захарова җитәкчелегендә махсус хәрби операциядәгеләргә цукат, киптерелгән алма, үлән чәйләре һәм башка бик күп әйберләр әзерләү белән шөгыльләнә. Бу хакта «Яңа Чишмә хәбәрләре» яза.
«Без «ВКонтакте» челтәре аша кабак уңышы байтак булган райондашларны безнең белән бүлешергә сораган идек. Бик күпләр безнең мөрәҗәгатькә битараф калмады. Рәхмәт аларга! Кабактан без цукатлар ясыйбыз», - дип сөйләде төркем активисты Татьяна Иванова.
Көмеш волонтерлар җәен дә байтак эш башкарган: маскировкалау челтәрләре үргән, тыюлыкка - тау битенә барганнар, чәй ясар өчен үләннәр җыйганнар. Үләннәрне клубта өстәлләргә җәеп, үз теплицаларында киптергәннәр, аннары ваклап, төргәкләргә төягәннәр.
Моннан тыш алар хәрбиләргә җыелмалар булдыралар: анда үлән чәйләре, кагыт, цукат, «коры душ», окоп шәме дә бар.
«Барлык эшләрне дә клубта эшлибез, ә җиләк - җимешләрне һәм яшелчәләрне өйдә киптерәбез», - ди Татьяна Валентиновна.
