Татарстан Рәисе Рөстәм Миңнеханов бүген Казанда Республиканың ветеринария учреждениеләренә машина ачкычлары тапшырды. Яңа техника терлекчелек өлкәсендә иркен тормышны саклау өчен өстәмә ярдәм булачак.
Республика җитәкчесе җыелучыларны Россиядә 31 августта билгеләп үтелә торган Ветеринария хезмәткәре көне белән котлады.
«Ветеринария хезмәте алдында торган республиканың биологик иминлеген тәэмин итү бурычы — бик җитди һәм җаваплы бурыч. Без изоляцияләнгән киңлектә яшәмибез. Илебездә имин булмаган эпизоотик вәзгыятьле төбәкләр булуын да истә тотарга кирәк», - диде ул.
Миңнеханов ассызыклаганча, әлеге тармак белгечләренең төгәл системалы контроль-күзәтчелек эше генә ветеринария иминлеген тәэмин итә ала. «Ә ул хайваннарга гына түгел, республика халкына да кагыла. Сез эшегезнең никадәр мөһим һәм кирәкле булуын аңларга тиеш», - дип белдерде ул.
Республика җитәкчелеге киләчәктә дә ветеринария хезмәтенә ярдәм итеп торачак, дип ышандырды ТР Рәисе. Татарстанда бу өлкәдә матди-техник базаны ныгыту өчен ел саен 30 миллион сумга якын акча бүлеп бирелә.
«Сез, үз чиратыгызда, республикада ветеринарияне яклауны тәэмин итү буенча хезмәт бурычларыгызны төгәл һәм принципиаль рәвештә үтәргә тиеш», - дип билгеләп үтте Миңнеханов.
Ул Татарстан Республикасы Министрлар Кабинетының Баш ветеринария идарәсе башлыгы Алмаз Хисаметдиновка һәм Ветеринария һәм фитосанитария күзәтчелеге федераль хезмәтенең ТР буенча идарәсе җитәкчесе Илнур Галиевка машина ачкычлары тапшырды.
Тантана республика парламенты мәйданчыгында узды. Анда шулай ук Татарстан Республикасы Дәүләт Советы Рәисе Фәрит Мөхәммәтшин һәм Татарстан Республикасы Авыл хуҗалыгы һәм азык-төлек министры Марат Җәббаров катнашты.
Район дәүләт ветеринария берләшмәләре белгечләренә егерме «Лада Нива Трэвел» автомобиле тапшырылды. Моннан тыш, Ветеринария һәм фитосанитария күзәтчелеге федераль хезмәтенең ТР буенча идарәсенә ун «Лада» автомобиле бирелде.
Өстәмә техника ярдәмендә белгечләр Татарстанның ерак урнашкан һәм барып җитү авыр булган районнарында ветеринария ярдәме күрсәтәчәк, шулай ук профилактик чаралар үткәрәчәк һәм хайваннарда йогышлы авыруларны бетерү буенча чаралар күрәчәк.
Ел саен язын һәм көзен ветеринария хезмәткәрләре эпизоотиягә каршы чаралар үткәрә. Аерым алганда, бу хайваннарга 4,4 миллионга якын вакцинация ясау, 4,5 миллионнан артык диагностик тикшеренү уздыру, елына 2 миллионга якын профилактик эшкәртү үткәрү.
Бүгенге көндә Татарстанда авыл хуҗалыгы хайваннарында аеруча куркыныч йогышлы авырулар буенча вәзгыять имин.
Ветеринария һәм фитосанитария күзәтчелеге федераль хезмәтенең ТР буенча идарәсе быел 1 727 контроль-күзәтчелек чарасы уздырган, 2 779 хокук бозу очрагын ачыклаган, административ җаваплылыкка тарту турында 152 карар чыгарган, закон бозуга юл куймау турында 1 654 кисәтү төзегән.
