Укытучы һәм медицина хезмәткәрләре балаларына мәктәпкәчә белем бирү оешмаларында беренче чиратта урын алу хокукы бирелергә мөмкин. Закон проектын Дәүләт Думасының Хезмәт, социаль сәясәт һәм ветераннар эшләре комитеты башлыгы Ярослав Нилов булдырган. Документ тексты ТАСС карамагында бар.
Инициатива авторы билгеләп үткәнчә, ата-аналар Россия Федерациясе гражданы булырга һәм кимендә 3 ел дәвамында тиешле дәүләт оешмаларында эшләргә тиеш. Автор үз позициясен Россиянең бүгенге көндә табиблар һәм укытучыларга кытлык кичерүе белән аңлата.
«Экспертлар әлеге проблеманың сәбәпләре арасында укытучыларга һәм табибларга йөкләнеш зур булуны, төбәкләр буенча тигез булмаган һәм түбән хезмәт хакларын, җитәрлек социаль гарантияләр булмауны билгели», — диелә аңлатма язуында.
Нилов фикеренчә, кадрлар җитмәү проблемасын хәл итү өчен, хезмәт хакларын арттырудан тыш, медицина һәм педагогика хезмәткәрләре өчен өстәмә социаль гарантияләр билгеләү бик мөһим. Бу аларга һөнәри бурычларын нәтиҗәле үтәү өчен шартлар тудырырга ярдәм итәчәк.
Бүгенге көндә балалар бакчаларында урыннар беренче чиратта полиция хезмәткәрләренең һәм хәрбиләрнең балаларына бирелә.
