БРИКС линиясе буенча күп планлы хезмәттәшлек берләшмәдә катнашучы илләрнең тотрыклы үсешен тәэмин итә, аларның төбәкләре арасындагы багланышлар үсешенә дә сизелерлек йогынты ясый. Бу хакта башкалаларның һәм зур агломерацияләрнең парламент дипломатиясен үстерүгә багышланган сессиядә катнашучыларга мөрәҗәгатендә Татарстан Дәүләт Советы Рәисе Фәрит Мөхәммәтшин белдерде.
Чара Мәскәүдә БРИКС илләренең VI Халыкара форумы кысаларында узды. Татарстан парламенты башлыгы видеоэлемтә аша катнашучыларны республика җитәкчелеге исеменнән сәламләде.
Ул искәрткәнчә, быел Казан Россия рәислеге кысаларында төп вакыйга — БРИКС дәүләтләре башлыклары саммитын кабул итә. Беренче тапкыр бу вакыйга киңәйтелгән форматта уза.
«Форсаттан файдаланып, тагын бер кат Россия Федерациясе Президенты Владимир Владимирович Путинга рәхмәт белдерәсебез килә, аның карары белән Татарстанга шундый әһәмиятле чараны уздыру ышанып тапшырылды. Безнең республика өчен бу зур дәрәҗә һәм җитди җаваплылык. БРИКС линиясе буенча күп планлы багланышлар дәүләтләрнең тотрыклы үсешен тәэмин итүгә, күпполяр һәм гадел дөнья төзелешен формалаштыруга, берләшмә кысаларында, шул исәптән парламент дипломатиясе ярдәмендә, төбәкара хезмәттәшлекне ныгытуга да сизелерлек өлеш кертергә тиеш», — дип белдерде ул.
Мөхәммәтшин билгеләп үткәнчә, бу Казан БРИКС химаясында кабул итә торган бердәнбер чара түгел. Шулай итеп, Татарстан башкаласында катнашучы илләр берләшмәләре мәгариф министрлары, спорт министрлары катнашында 11нче очрашу, гадәттән тыш хәлләр ведомстволары җитәкчеләре киңәшмәсе, эшче төркемнәрнең берничә очрашуы, шулай ук БРИКС Спорт уеннары узды. Моннан тыш, Татарстан башкаласында июнь аенда БРИКС+ илләре шәһәрләре һәм муниципалитетлары ассоциациясе гамәлгә куелды. Аңа 18 меңнән артык муниципалитет керде, аларның гомуми халкы 2 млрд кешедән артып китә.
Татарстан Дәүләт Советы Рәисе сүзләренчә, БРИКС илләренең Халыкара форумы — ул уникаль чара, берләшмә шәһәрләре һәм мегаполислары арасында нәтиҗәле диалог булдыруда зур практик роль уйнаячак. Биредә төрле, шул исәптән фән, икътисад, инновацияләр, иминлек һәм башка өлкәләрдә хезмәттәшлекне үстерүнең актуаль мәсьәләләре күтәрелә.
«Парламент бәяләве белән мондый диалог берләшмә илләре арасында дустанә элемтәләрне ныгытуга, аларның халыкара аренада йогынтысын арттыруга да ярдәм итә», - дип ышана ул.
Халыкара форум 27 августта Мәскәүдә «Экспоцентр» үзәк күргәзмә комплексы мәйданчыгында ачылды һәм ике көн дәвам итә. Чара хакимият һәм бизнес арасында тәҗрибә уртаклашу, муниципалитетара хезмәттәшлекнең төп мәсьәләләре буенча фикер алышу өчен зур халыкара мәйданчыкка әверелергә тиеш.
Форумда 126 илдән делегация көтелә. Катнашучылар Россиянең 89 төбәгеннән килер дип планлаштырыла. Дөньяның 500 шәһәреннән 5 меңнән артык кеше икътисад, цифрлы технологияләр, экология, шәһәр инфраструктурасы, транспорт, сәламәтлек саклау, мәгариф һәм мәдәниятнең актуаль проблемалары турында фикер алышачак.
