Россия Федерациясе Герое, тумышы белән Татарстанның Бөгелмә шәһәреннән булган Сергей Рыжиков Халыкара галәм станциясенә (МКС-73) 73нче озак дәвам итүче экспедициянең төп экипажы составына керәчәк, экипаж Халыкара галәм станциясенә 2025 елның мартында «Союз МС-27» кораблендә юл тотачак. Бу хакта Роскосмосның матбугат хезмәте хәбәр итә.
Рыжиковтан тыш, МКС-73нең төп экипажына Роскосмосның тагын бер космонавты - Алексей Зубрицкий, шулай ук NASA астронавты Джонатан Ким керәчәк.
Кимның очышы МКСка очышлар турында Роскосмос һәм NASA арасындагы килешү нигезендә оештырыла. Шушы ук килешү буенча Роскосмос космонавты Кирилл Песков Crew Dragon корабле (миссия Crew-10) экипажына кертелгән, ул 2025 елның февралендә галәмгә очар дип көтелә.
Рыжиков, Зубрицкий һәм Ким 72нче озак дәвам итүче экспедициянең кабатланучы экипажын тәшкил итә, ул Халыкара галәм станциясенә быелның 11 сентябрендә «Союз МС-26» кораблендә юл тотарга тиеш. МКС-72нең төп экипажы – космонавтлар Алексей Овчинин һәм Иван Вагнер, астронавт Дональд Петтит.
2025 елның икенче яртыеллыгында Халыкара галәм станциясенә «Союз МС-28» кораблендә - 74нче озак дәвам итүче экспедиция (Сергей Кудь-Сверчков, Сергей Микаев һәм Олег Платонов), ә 2026 елда «Союз МС-29» кораблендә 74нче озак дәвам итүче экспедиция (Петр Дубров, Сергей Корсаков һәм Анна Кикина) юл тотарга тиеш.
Сергей Рыжиков галәмгә беренче тапкыр – 2016 елның октябре – 2017 елның апрелендә (Халыкара галәм станциясенә 50нче озак дәвам иткән экспедиция), ә икенче тапкыр 2020 елның октябре – 2021 елның апрелендә (64нче озак дәвам иткән экспедиция) очты. Ул галәмдә барлыгы 358 тәүлек 2 сәгать 5 минут булган.
