Галиәсгар Камал исемендәге Татар дәүләт академия театрының баш режиссеры, Россия һәм Татарстанның атказанган сәнгать эшлеклесе Фәрит Бикчәнтәев журналист Рәшит Минһаҗның «Зәңгәр шәл» спектаклендә дин әһелләре мыскыл итеп тәкъдим ителәме», дигән соравына карата фикерен әйтте.
«Зәңгәр шәл» спектакле беренче мәртәбә 1926 елда куела. Ул ничә еллар буена куела - гел шул мәсьәләгә бәйләнәләр. Марсель Хәкимович Сәлимҗановка да бәйләнделәр, зур-зур академиклар бәйләнде. Мин Марсель абыйча җавап бирмим, берәр кешене үпкәләтермен дип куркам. Бу бит тарихи вакыйга, монда дин әһелләренә каршы бер киная дә юк. Ул шулай булган, нишләтәсең?» – диде ул «Татар-информ» мәгълүмат агентлыгында матбугат очрашуында.
Ул татар театрының электән дин әһелләренә карата тәнкыйть белән чыкканын искәртте. «Әгәр дә тәнкыйть булмаса без бер урында тапталыр идек. Тәнкыйть булган чакта без алга барабыз дигән сүз. Кәрим Тинчурин үзе дә мәдрәсә тәмамлаган кеше, беренче артистлар барысы да мәдрәсәдә укып чыкканнар. Аллаһ теләсә, «Зәңгәр шәл» спектакле беркайчан да татар театры сәхнәсеннән төшмәячәк. Ул күпме барса да, гел бәйләнәчәкләр. Ләкин мин ишан образын бик яратам», - диде баш режиссер.
«Һәр режиссерның әсәр аша үз фикерен тамашачыга җиткерергә хакы бар. Театрның вазифасы автор ничек язган - шулай кую түгел. Менә үзешчән театрлар шулай куя. Һәр укучы әсәрне үзенчә укый. Шәп авторның әсәрдә мәгънәсе бер генә түгел. Бөек автор беркайчан да төгәл итеп үз фикерен әйтми, ул аны укучыга уйлап бетерер өчен калдыра. Театр да шулай ук. Шуңа күрә ул бөек әсәр. Аны кат-кат укыйсы, карыйсы килә», - диде Фәрит Бикчәнтәев.
Режиссер Айдар Җәббров режиссерның да рәссам булуын билгеләп үтте.
«Әсәрнең авторы - минем автордашым дип кабул итәм. Мәсәлән, «Рәшә» спектаклен мин бер төрле күрәм, Фәрит абый Бикчәнтәев аны икенче төрле куяр иде. Һәр төрле режиссер үзенчә, үз күзлегеннән куя. «Рәшә» спектаклендә мин икенче, өченче планда булган күренешләрне беренче планга чыгардым, минем өчен ул мөһим. Шулай театр барлыкка килә дип уйлыйм. Әсәрләрне бозып булмый, алар инде язылган», - диде ул.
