Казанда 11нче тапкыр халыкара «Татар кызы» бәйгесенең ярымфиналы бара. Бәйге дәвамында биш чит ил һәм Россиянең 25 төбәгеннән килгән кызлар аш-су һәм кул эше этабын үтә. Алар «Туган авылым» комплексында токмач кисте.
Токмач кисү остаханәсен «Ак калфак» Бөтендөнья татар хатын-кызлары иҗтимагый оешмасы рәисе Кадрия Идрисова үткәрде.
«Без һәр елны кызларга кул эшләрен өйрәтәбез, төрле камыр ашлары пешерәбез. Күп игътибарны токмач кисүгә бирәбез. Чөнки татар хатын-кызы камыр белән эшли белә икән, димәк, бу кыз киләчәктә милләт анасы була ала. Димәк, ул кул эшләренә өйрәнгән дигән сүз», – диде ул.
Бәйгедә кызларны камыр басу, җәю, токмачны кисү буенча бәяләделәр. Кадрия Идрисова әйтүенчә, бөтен кызлар да биремне үтәде. Араларында токмачны ике төрле итеп кисүчеләр дә булды.
«Оренбургтан килгән Алсу Байгильдина ике төрле алымны да күрсәтте. Ул гадәти итеп тә кисте, тәңкә токмач та кисте. Кукмара, Мамадыш, Арча икенче гильдия сәүдәгәрләре, Екатерина II кушуы буенча Казахстан белән араны яхшырту өчен Оренбург якларына киткән. Шулай итеп, тәңкә токмач, кияү токмачы Оренбургта сакланып калган. Оренбург татарлары бик хөрмәтле кунак килгәндә тәңкә токмач кисәләр», – дип аңлатты Кадрия Идрисова.
Ярымфиналда катнашучы кызлар кул эше этабында чулпы ясаячак. Шулай ук, аларны иҗади этапта бәяләячәкләр.
