Казанда 15,3 миллион сумга «Аксенов-фест» әдәби фестивален үткәрәчәкләр. Шул хактагы тендер дәүләт сатып алулары порталында урнаштырылган.
Вакыйга берничә мәйданчыкны, шул исәптән Казан Ратушасын, язучының музей-йортын, Милли китапханәне һәм башкаларны колачлаячак. Подрядчы чара өчен полиграфия һәм бүләк продукциясе әзерләячәк, мәйданчыкларның техник яктан тәэмин ителешен, фото- һәм видеога төшерүне, интернет белән тәэмин итүне, шулай ук «Йолдызлы билет» премиясен үткәрүне кайгыртачак.
Соңгы чара кысаларында танылган мәдәният эшлеклеләре һәм әдәбият әһелләреннән торган профессиональ жюри эшләр, язучылар белән мастер-класслар оештырылыр дип көтелә. Мәйданчыкта тәрҗемәчеләр эшләячәк, шулай ук Россия эстрадасы йолдызларының чыгышлары планлаштырылган. Кунаклар өчен Мәскәү, Кытай, Һиндстан, Иран, Берләшкән Гарәп Әмирлекләре, Үзбәкстан һәм Сербиядән рейслар, экскурсияләр оештырылачак, барысы да яшәү урыны белән тәэмин ителәчәк.
Эшләр 2024 елның 30 сентябреннән дә соңга калмыйча башкарылырга тиеш. Чараны оештыру өчен акча Казан бюджетыннан бүленә, заказчысы – шәһәр башкарма комитетының Мәдәният идарәсе.
