РФ Президенты Владимир Путин традицион кыйммәтләрне (Россия аңлавындагыча) яклаучы чит ил кешеләренә илдә вакытлыча яшәү хокукы бирә торган указ имзалады. Документ хокукый актларны рәсми чыгару порталында урнаштырылган.
Расланган квотадан тыш һәм рус теле, Россия тарихы һәм РФ законнары нигезләрен белүне раслаучы документсыз вакытлыча яшәүгә рөхсәт бирү турында гариза белән «Россиянең традицион рухи-әхлакый кыйммәтләренә каршы килә торган деструктив неолибераль идеологик карашларны көчләп тагучы сәясәтне кабул итмәү мотивлары белән» Россиягә күченергә теләгән чит дәүләт гражданнары һәм гражданлыгы булмаган затлар мөрәҗәгать итә алачак.
Әлеге шартларга туры килүче чит ил кешеләренә бер тапкыр бирелә торган гади шәхси виза биреләчәк (өч айга) — дипломатик вәкиллек яки консуллык учреждениесе җитәкчесе карары буенча.
Традицион кыйммәтләргә (Россия аңлавындагыча) каршы килә торган идеологик карашларны гамәлгә куючы дәүләтләр исемлеген Тышкы эшләр министрлыгы китерүе буенча РФ Хөкүмәте раслаячак.
Хәзер Хөкүмәт бер ай эчендә указны гамәлгә ашыруга юнәлдерелгән чараларны булдыруны тәэмин итәргә һәм аңа ярашлы рәвештә үзенең актларын китерергә тиеш.
