Актаныш районы Шәбезбаш авылында үзсалым акчасына ясалган балалар уен мәйданчыгын ачу тантанасы булды. Тасманы авылның кечкенә дәвамчылары Ислам Зиязетдинов һәм Илдан Газетдинов кисте. Бу хакта «Актаныш» сайтында Ләйсән Газизова хәбәр итә.
Авыл җирлеге башлыгы Дилбәр Ралиф кызы авылны төзекләндерүдә башкарылган эшләр өчен Шәбезбаш кешеләренә рәхмәтен белдерде, киләчәктә дә кулга кул тотынып эшләүләрен теләде.
Бәйрәмнең икенче өлешендә авыл клубында кечкенә артистлар тарафыннан әзерләнгән курчак театры спектакле булды. Соңыннан балалар, әниләр, әбиләр аниматор Алсу апалары оештырган уеннарда катнашты, рәхәтләнеп күңел ачты.
«Бәйрәм чәй табыннары артында төгәлләнде. Авылда, шәһәрдә яшәүче балалар да әби-бабайларын, әти-әниләренең туган авылларын яратсыннар, туган телебезне онытмасыннар өчен мондый чаралар бик әһәмиятле булып тора», диелгән хәбәрдә.
