Әлмәттә махсус хәрби операциядә катнашучыларның гаиләләренә актив ярдәм күрсәтәләр. Узган елның июленнән анда «Нур» Психологик ярдәм үзәге дә катнаша.
Бу сезонда балалар өчен ике җәйге интенсив үткәрергә ниятлиләр. Шәһәрнең төрле локацияләренә бару 2024 елның яңалыгы булачак.
Әлмәт районы матбугат хезмәтендә «Татар-информ» агентлыгына хәбәр итүләренчә, шушы көннәрдә 20 бала «Нур» белгечләре белән бергә «Бушидо Парк» күңел ачу үзәгендә булды.
Районда махсус операциядән соң хәрбиләрне социаль тернәкләндерү процессына, шулай ук мобилизация һәм контракт нигезендә хезмәт итүчеләрнең гаиләләренә булышлык күрсәтүгә зур игътибар бирелә. 2024 елның башыннан бирле «Нур» үзәге 500гә якын кешегә психологик ярдәм күрсәткән. Бу, нигездә, ТР Яшьләр эшләре министрлыгының «Бергә бәхетле» грант проектын гамәлгә ашыру нәтиҗәсендә мөмкин булган.
Грант проекты кысаларында хәрбиләрнең туганнарына психологик сәламәтлекне яхшыртуга юнәлдерелгән 700дән артык хезмәт күрсәтелгән. Әлеге проект психологик практикалар кулланып хәрбиләр гаиләләренең адаптация һәм социализация дәрәҗәсен күтәрү, аңлы яшәү рәвеше күнекмәләрен үстерү һәм аңа өйрәтү, шәхси таяну нокталарын формалаштыруга (һ.б.) юнәлдерелгән.
Элегрәк «Татар-информ» агентлыгы Әлмәт районында туып үскән хәрбинең сугышчыларны коткарган өчен бүләккә лаек булуы хакында хәбәр иткән иде.
1 августтан Татарстанда РФ Саклану министрлыгы белән контракт төзегән хәрбиләргә 1,7 миллион сумга якын акча бирелә. Түләүләрнең күләме арту РФ Президентының күрсәтелгән чорда махсус операция зонасында хезмәт итү өчен контракт төзегән хәрбиләргә 400 мең сум (элеккеге 195 мең сум урынына) күләмендәге федераль түләү турындагы яңа указы белән бәйле.
Махсус хәрби операция РФ Президенты Владимир Путин карары буенча 2022 елның 24 февраленнән үткәрелә. Хакимият берничә тапкыр аның куелган максатларга ирешкәнче дәвам итәчәген белдерде. Максатлар арасында Россиянең иминлеген гарантияләүче шартлар булдыру да бар.
