Татарстанның Лаеш районы Столбище авылында ике ир-ат яшен сугу нәтиҗәсендә төрле җәрәхәтләр алган. Республика клиник хастаханәсендә «Татар-информ» агентлыгына бу мәгълүматны расладылар.
39 һәм 52 яшьлек ир-атларны, яңгыр астында каядыр барган вакытта, көтмәгәндә яшен суккан. Бүген иртәнге уннар тирәсендә зыян күрүчеләрне ашыгыч ярдәм машинасында Республика клиник хастаханәсенә китерделәр.
39 яшьлек ир-ат тәненең 30 проценты 1-2 дәрәҗәдә пешкән, аны реанимация бүлегенә салганнар. Табиблар аның хәлен авыр дип бәяли. 52 яшьлек ир-ат исә аягы авыртуга һәм оюга зарланган. Ул йөрәк ритмы бозылуны хирургик дәвалау һәм электрокардиостимуляция бүлегендә даими күзәтү астында булачак.