Ярдәмне Татарстан Республикасы премьер-министры урынбасары – Татарстан Республикасының Россия Федерациясендәге тулы вәкаләтле вәкиле Равил Әхмәтшин, Чаллы шәһәре мэры Наил Мәһдиев, Тәтеш районы башлыгы Рәмис Сәфиуллов илтеп тапшырган. Бу хакта Татарстан Республикасының Мәскәүдәге вәкаләтле вәкиллеге хәбәр итә.
Йөкне формалаштыруда шулай ук делегация составына кергән меценатлар Рөстәм Гатауллин («Барсмед») һәм Рафаэль Фаизов катнашкан. Татлы ризыклар салынган машинаны Сейран Курбетдинов («Тимоша») җибәргән.
Татарстанлылар «Төньяк» гаскәрләр группировкасы хәрбиләре белән очрашкан һәм аларга биш йөк автомобиле белән махсус техника, беренче кирәк-яраклар, азык-төлек продуктлары китергән. Делегация шулай ук өч УАЗ машинасы, квадроцикл һәм алты мотоцикл алып килеп биргән.
Равил Әхмәтшин алдынгы хәрби хезмәткәрләргә, шул исәптән Татарстаннан хәрбиләргә, «Армия генералы Мәхмүт Гәрәевка 100 ел» истәлекле медале, мактау грамоталары, шулай ук бүләкләр һәм сәгатьләр тапшырган.
Очрашу күмәкләшеп чәй эчә-эчә дусларча аралашу белән дәвам иткән. Татарстанлылар хәрбиләргә хезмәтләре өчен рәхмәт белдергән, сабырлык һәм тизрәк өйгә кайтуларын теләгән.
