Россиягә кичеп килергә ниятләгән чит ил кешеләре балаларына рус телен алдан ук өйрәтергә тиеш. Мәгариф һәм фән өлкәсендә күзәтчелек федераль хезмәте (Рособрнадзор) башлыгы Анзор Музаев шундый фикере белән уртаклашты.
Аның сүзләренчә, мондый әзерлек балага ул яшәячәк илдә үз-үзен тоту һәм аралашу культурасын яхшырак аңларга ярдәм итәчәк.
«Әгәр син тормышыңны Россия белән бәйләргә, аның гражданины булырга, балаларыңның биредә белем алуын телисең икән, рус телен белми торып белемнәрне ничек үзләштерергә?» - дигән риторик сорау бирде Музаев РИА Новости агентлыгына биргән интервьюсында.
Ул билгеләп үткәнчә, рус телен алдан ук өйрәнү баланың Россия мәктәбендә белем алуын һәм яшьтәшләре арасында адаптациясен җиңеләйтәчәк.
