Питрәч районыннан күп балалы Гаврилиннар гаиләсендә – алты бала, шуларның дүртесе – малайлар. Аларның икесе – уртанчысы һәм кечесе – өлешчә мобилизациягә эләккән, әмма олы абыйлары Николай аларның үзләрен генә җибәрәсе килмәгән һәм үзе дә махсус хәрби операция зонасына туган илен якларга юл тоткан, дип яза «Татар-информ» хәбәрчесе Александра Давыдова.
«Минем энеләрем генә түгел, улларым да бар, мин алар өчен – үрнәк. Кемдер: «Кая барыйм, минем бит балалар», - дип әйтә. Ә мин, киресенчә, аларга әтиләре «дөрес камырдан басылган» икәнен күрсәтү өчен киттем. Анда нинди хәлләр барганын күргәч, беренче чиратта, болар барысы да безгә килеп җитә күрмәсен дигән уй туа», - диде Николай.
Хатыны белән өч бала үстерүләренә һәм күп балалы гаилә саналуга да карамастан, ир-ат шәхси инициатива күрсәткән һәм махсус хәрби операциягә китәргә теләк белдергән. Хәрби комиссариатта башта бу идеяне хупламаганнар, әмма Гаврилин үз дигәнендә нык торган. Якыннары, барыбер үзенчә эшләячәген белгәч, аның карарын хуплаган.
Николай махсус хәрби операция зонасында сержант дәрәҗәсендә мотоукчы взводы командиры урынбасары вазифасында хезмәт иткән. 2023 елның ноябрендә ул яраланган, әмма берничә атна эчендә савыгып, шунда ук алгы сызыкка юл тоткан. Госпитальдән чыкканнан соң озак та үтми икенче тапкыр яраланган.