«Яндекс» тәрҗемәчесен татар сөйләмен аңларга өйрәтәчәк һәм татар теле Россия халыклары телләре арасында беренче шундый тел булачак. Бу хакта компаниянең матбугат хезмәте хәбәр итә.
Шул рәвешле, кулланучылар бу телдәге сүзләрнең ничек яңгыравын беләчәк, алга таба шул телдә сөйләшүчеләр белән аралашу өчен тиз арада тәрҗемә итү функциясеннән дә файдалана алачак.
Эзләү мәгълүматларын анализлагач, белгечләр татарча гыйбарәләрне тәрҗемә итү Россиядә яшәүче башка халыкларның телләренә караганда кулланучыларны ешрак кызыксындырган дигән нәтиҗәгә килгән.
Компаниядә тәрҗемәчегә шулай ук Россиядәге егермедән артык халыкның телләрен кертергә җыенуларын билгеләп үттеләр. Алар арасында осетин теле сервиста беренче булып барлыкка килде.
