Тикшерүчеләр Коми Республикасында әйләнеп капланган пассажир поезды вагоннарының берсе астында ир-ат мәетен тапкан. Бу хакта Россия Тикшерү комитетының транспортта Көнбатыш төбәкара тикшерү идарәсе матбугат хезмәтендә хәбәр иттеләр.
26 июнь кичендә Коми Республикасында Инта-Угольный станцияләре арасында Воркута-Новороссийск маршруты буенча хәрәкәт иткән пассажир поездының 9 вагоны рельслардан чыгуы хакында хәбәр килгән. Россия тимер юллары мәгълүматларыннан күренгәнчә, поездда барлыгы 232 кеше булган.
Сәламәтлек саклау министрлыгында хәбәр итүләренчә, 40 кеше зыян күргән. Аларны реанимацияләү һәм операция ясау таләп ителмәгән. Поездның калган пассажирлары бүген иртән махсус график буенча билгеләнгән пунктларга озатылган, дип өстәделәр Россия тимер юлларында.
Тикшерүчеләр әлеге факт буенча җинаять эше кузгаткан.
