Татарстан Дәүләт Советы Рәисе Фәрит Мөхәммәтшин Беларусь Республикасына эш сәфәренә килде. 27-28 июльдә Витебск, Полоцк һәм Новополоцк шәһәрләрендә «Союз дәүләтенең инновацион икътисадын төзүдә төбәкара хезмәттәшлекнең роле» темасына Беларусь һәм Россия төбәкләренең XI форумы узачак. Бу турыда Татарстан Дәүләт Советы матбугат хезмәте хәбәр итте.
Форум ел саен Россия һәм Беларусь парламентларының югары палаталары химаясендә була. Бүген форумның тематик секцияләре утырышлары узачак. Фәрит Мөхәммәтшин регионара хезмәттәшлекне үстерү мәсьәләләре буенча секция эшендә катнашырга планлаштыра.
Иртәгә Россия Федерациясе Федераль Җыены Федерация Советы Рәисе Валентина Матвиенко һәм Беларусь Республикасы Милли җыены Республика советы Рәисе Наталья Кочанова Беларусь һәм Россия төбәкләре дәүләт хакимияте органнары җитәкчеләре белән очраша.
28 июнь көнне көннең икенче яртысында дәүләт хакимияте органнары, профильле министрлыклар һәм ведомстволар, предприятиеләр һәм оешмалар җитәкчеләре, Беларусь һәм Россия эшлекле даирәләре вәкилләре катнашында форумның пленар утырышы уза.
Форумның төп бурычлары булып Союз дәүләтенең интеграция процессларын тирәнәйтү, Беларусь һәм Россиянең парламентара, сәүдә-икътисади һәм гуманитар элемтәләрен ныгыту, эшлекле элемтәләрне киңәйтү, ике яклы хезмәттәшлекнең перспективалы юнәлешләрен үстерү тора.
Безнең республикадан форумда шулай ук Татарстан Республикасының Беларусь Республикасындагы сәүдә-икътисади вәкиле Илһам Кашапов, Казан шәһәре беларусларының «Спадчына» («Мирас») иҗтимагый оешмасы җитәкчесе Сергей Маруденко һәм башка рәсми затлар катнаша, диелә хәбәрдә.