Әлмәтне Татарстан республикасының көньяк-көнчыгыш спорт башкаласы дип атарга була. Алга киткән спорт базасы ярдәмендә Әлмәт даими рәвештә республика һәм бөтенроссия дәрәҗәсендәге ярышлар уздыру мәйданчыгына әверелә. Аларның берсе-ел саен үткәрелә торган «Триатлон АМР» спорт сменасы. Бу хакта «Әлмәт таңнары» хәбәр итә.
Быел җыенда триатлон буенча спорт секцияләреннән 200 бала катнашты. 21 көн дәвамында яшь спортчылар тырышып күнегүләр ясый, дөрес туклана, ә буш вакытларында төрле теоретик дәресләргә, квестларга һәм мастер-классларга йөри.
«Триатлон АМР» кысаларында шәһәр сусаклагычы территориясендә ярышлар профильле сменаның йомгаклау чарасы булды. Финишка кадәр ярышларда катнашучыларга йөзәргә, йөгерергә һәм велосипедта йөрергә кирәк иде. Һава шартларын исәпкә алып, оештыручылар бассейнда йөзү буенча ярышлар үткәрделәр.
Һәр катнашучы спорт әзерлеге генә түгел, яхшы нәтиҗәләр дә күрсәтте. Җиңүчеләр 5 яшь категориясендә билгеләнә.
Бүләкләү тантанасын Әлмәт муниципаль районы башкарма комитетының эшләр идарәчесе Әнүзәр Юнысов үткәрде.
«Сезне спорт сменасы тәмамлану белән котлыйм. Киләчәктә сезнең арада дөнья чемпионнары, Олимпия уеннарында катнашучылар һәм призерлар булыр дип өметләнәбез. Сезгә спортта яңа казанышлар, яңа рекордлар телим», - диде Әнүзәр Юнысов.
Чара медальләр, грамоталар, бүләкләр тапшыру һәм гомуми фотога төшү белән тәмамланды.
