БРИКС саммиты узу сәбәпле, Казан федераль университеты киләсе уку елы башын 1 сентябрьдән 1 ноябрьгә күчерде. Бу хакта КФУ ректоры Ленар Сафин ТР Министрлар Кабинетында узган брифингта хәбәр итте.
«БРИКС илләре саммитын уздыруга бәйле рәвештә, Универсиада авылы комплексы җәмәгать тәртибен сакларга киләчәк хезмәткәрләрне урнаштыру өчен кулланылачак», - диде спикер.
Сафин әйтүенчә, 1 сентябрьдән 17 октябрьгә кадәр студентларны белем бирү программалары буенча мөстәкыйль эш формасында теоретик уку көтә. 18 октябрьдән 31 октябрьгә кадәр ике атналык каникул каралган.
Беренче семестр буенча тулы күләмдә көндезге уку 1 ноябрьдә башланачак. 2025 елның 10 февраленнән беренче семестрдан соң каралган сессия башлана. 3 марттан 9 мартка кадәр студентларга бер атналык каникул бирелә. Ә 10 мартта икенче семестр башлана.
«Студентларның барлык хокуклары үтәләчәк. Университет ярдәм күрсәтәчәк», - дип ышандырды КФУ ректоры.
Универсиада авылында студентлар булмаган чорда биналарда ремонт эшләнәчәк, дип билгеләп үтте ул. «Биш йорт инде БРИКС Уеннарына ремонтланды. Калган уналты йортта да ремонт эшләрен башкарачакбыз», - дип ассызыклады спикер.
