Махачкала һәм Дербентта кораллы кешеләр һөҗүме вакытында 20 кеше һәлак булган һәм 46 кеше зыян күргән. Бу хакта Дагыстанның сәламәтлек саклау министрлыгында хәбәр итәләр, дип яза «Российская газета».
Республиканың сәламәтлек саклау министры Татьяна Беляева сүзләренчә, зыян күрүчеләр арасында полиция хезмәткәрләре дә, тыныч халык та бар. Җиде кеше авыр хәлдә.
Яраланучылар республика хастаханәләре һәм Дербентның үзәк шәһәр хастаханәсендә дәвалана. Аларга барлык кирәкле ярдәм күрсәтелә.
Беляева хәбәр иткәнчә, Дагыстан табиблары федераль клиникалар белгечләре белән дәвалау барышы турында киңәшләшә. Өстәмә тикшерүдән соң җитди җәрәхәтләр алган пациентларны башка төбәкләрнең хастаханәләренә эвакуацияләү турында карар кабул ителергә мөмкин. Шулай ук кайбер пациентларны ведомство учреждениеләренә күчерергә хәл ителде.
23 июнь кичендә Дербент һәм Махачкала чиркәүләренә һәм синагогасына кораллы һөҗүмнәр ясалды. Элегрәк 15 хокук саклау органнары хезмәткәре һәм дүрт граждан кешесе һәлак булуы турында хәбәр ителгән иде. Алар арасында Дербенттагы Покров пресвятая Богородица чиркәвеннән рухани – Николай атакай да бар.
