Лениногорск мэриясе бинасында кыска вакытлы ялга кайткан хәрбиләр белән район башлыгы Рәгать Хөсәенов очрашу уздырды. Контрактчылар, мобилизацияләнүчеләр белән очрашу җылы атмосферада, чәй өстәле артында узды, анда шулай ук шәһәр хезмәтләре җитәкчеләре дә катнашты. Бу хакта «Заман сулышы» сайтында Розалия Мостафина хәбәр итә.
«Сез – безнең чын батырлар, район, республикага тап төшермичә, үз бурычыгызны үтисез. Без монда телевизордан күреп, матбугат битләреннән укып кына андагы хәлләрне беләбез. Ә сез шул вакыйгаларның үзәгендә, авыр шартларда гомерегезне куркыныч астына куеп хезмәт итәсез. Махсус хәрби операциядәге барлык якташ ир-егетләргә рәхмәт», - диде Рәгать Хөсәенов һәм исән-имин кайтуларын теләде.
Хәрбиләр үзләренең хезмәтләре турында кыскача сөйләде. Махсус хәрби операция зонасына гуманитар ярдәмнең килүен дә хәбәр иттеләр. Район башлыгы әйтүенчә, гуманитар ярдәм илткәндә, кайбер якташ солдатлар янына барып җитү мөмкин түгел. Хәрбиләр исә безнең районнан булмаса, башка җирдән гуманитар ярдәм килүен әйтте.
«Ашау ягы әйбәт. Обмундирование буенча да сораулар юк. Ә менә квадрокоптерлар артык булмас иде», - диделәр.
Соңыннан хәрбиләр лениногорскилыларның һәрьяклап ярдәмнәре өчен рәхмәтләрен җиткерде. Мондый очрашулар традициягә керде, алармахсус хәрби операция зонасындагы вазгыятьне һәм ихтыяҗны белергә мөмкинлек бирә.
