Казанда якындагы декадада уртача тәүлеклек температура климат нормасыннан 4-6 градуска югарырак булачак. Аномаль эсселекнең сәбәпләрен «Татар-информ»га КФУ профессоры, география фәннәре докторы Юрий Переведенцев аңлатты.
«Хәзерге һава торышын Урта Идел буенда урнашкан антициклон билгели. Көнбатыштарак, Мәскәүдә бу кадәр эссе түгел, явым-төшемнәр бар. Мондый эсселек Уралда, Себердә дә юк. Бу антициклон инде озак саклана – икенче атна. Ул безнең төбәккә Скандинавия ягыннан килде», - дип хәбәр итте ул.
Галим әйтүенчә, бу кадәр эссе һава торышы күбрәк июль уртасына хас. Июнь аенда ТР башкаласында уртача айлык температура норма буенча 18 градус, ә июль аенда 21 градус тирәсе булырга тиеш. Хәзер бу күрсәткеч күпкә югарырак. Әйтик, 12 июньдә, Россия көнендә, Мәскәүдә көчле яңгыр көтелә, ә Казанда исә көндез һава +32 градуска кадәр җылына, бернинди явым-төшем булмый.
