Татарстанда 49 чыгарылыш сыйныф укучысы химиядән БДИны йөз баллга тапшырган, узган елда исә мондый нәтиҗәгә 26 укучы ирешкән булган. Географиядән бердәм дәүләт имтиханын өч 11 сыйныф укучысы йөз баллга тапшырган, 2023 елда бу фәннән имтиханны йөз баллга ике кеше биргән. Рус әдәбиятыннан имтихан өчен 107 укучы йөз балл җыйган, узган елда мондый нәтиҗәгә ирешүчеләр 65 укучы булган. Бу хакта ТР Мәгариф һәм фән министрлыгының матбугат хезмәте хәбәр итә.
«23 майда 1932 чыгарылыш сыйныф укучысы химиядән БДИ тапшырды. Бер укучы җитди сәбәп буенча имтиханны тәмамламады. Ул химиядән бердәм дәүләт имтиханын резерв көнне – 18 июньдә тапшырачак», – дип билгеләп үттеләр ведомствода.
Химиядән БДИның уртача баллы 66,94 тәшкил итте. 147 чыгарылыш сыйныф укучысы 36 баллны тәшкил иткән минималь чикне үтә алмады.
Рус әдәбиятыннан БДИны 23 майда 737 кеше тапшырды. Имтиханны җитди сәбәп буенча бер укучы тапшыра алмады. Бу фәннән имтиханда уртача балл 77,32 тәшкил итә. Өч укучы 32 баллны тәшкил иткән минималь чикне үтә алмаган.
Географиядән БДИны исә 23 майда 170 укучы тапшырды. Бу фән буенча уртача балл 62,74 тәшкил итә. Шул ук вакытта өч укучы 37 баллны тәшкил иткән минималь чиктән югарырак нәтиҗә ала алмаган.
Химиядән БДИ нәтиҗәләрен яхшыртырга теләүче укучылар 4 июльдә, ә география һәм рус әдәбиятыннан нәтиҗәләрен төзәтергә иеләүчеләр 5 июльдә имтиханны яңадан тапшыра алачак. Беренче нәтиҗә юкка чыгарылачак.
