Казан спортчысы Рамилә Вәлитова җиңел атлетика буенча Россия команда чемпионаты призеры булган. Ул озынлыкка сикерүдә, шәхси рекорд куеп, бронза медаль яулаган, аның нәтиҗәсе – 6 м 48 см. Бу аңа БРИКС уеннарында катнашу өчен РФ җыелма командасына керергә мөмкинлек бирә. Казан мэриясе шул хакта хәбәр итте.
Озынлыкка сикерүдә иң яхшысы дип Елена Соколова (Мәскәү, Белгород өлкәсе) табылган, аның нәтиҗәсе – 6 м 61 см. Икенче урында – Краснодар краеннан Екатерина Левицкая (6 м 56 см).
Казанда Рамилә Вәлитова «Хезмәт резервлары» физкультура-спорт берләшмәсендә Олег Арбеев җитәкчелегендә шөгыльләнә.
Россия команда чемпионаты Сочида бөтен ил спортчыларын берләштергән. Быел ул җиңел атлетлар өчен июнь аенда Казанда үтәчәк БРИКС уеннарына сайлап алу турниры кебек узган. Бу хакта РФ Җиңел атлетика федерациясендә хәбәр иттеләр.
