Илнең төрле төбәкләрендә дә укытучы хезмәтенә бердәм кагыйдәләр нигезендә түләнергә тиеш, ә хөкүмәт педагогларга хезмәт хакы түләүгә карата системалы алымнар әзерләргә тиеш. Бу хакта Россия Президенты Владимир Путин Россия Дәүләт Советы утырышында белдерде, дип хәбәр итә Кремльнең матбугат хезмәте.
«Мин Хөкүмәттән укытучының хезмәт хакы проблемасына системалы чишелешләр тәкъдим итүне сорыйм. Монда төрле алымнар бар, мин хәзер детальләргә кермәячәкмен, [вице-премьер] Татьяна Алексеевна [Голикова] сөйли ала. Әмма бу төрле алымнар, гомумән алганда, билгеле <...> , бу юнәлештә хәрәкәт итәргә кирәк», — дип билгеләп үтте дәүләт башлыгы.
Президент шулай ук 2012 елда мәктәп укытучыларының уртача хезмәт хакын төбәкләрдәге уртача хезмәт хакына кадәр арттыруны йөкләвен искәртте. «Бу чара укытучылар хезмәтенең абруен күтәрүдә билгеле бер роль уйнады. Шул ук вакытта педагогларның хезмәтенә түләү механизмнарын камилләштерергә, гаделрәк итәргә кирәк», — дип билгеләп үтте Россия лидеры.
Путин сүзләренчә, эш шунда ки — кайбер төбәкләрдә укытучыларның керемнәре илдәге уртача күрсәткечтән күпкә түбән. «Укытучы хезмәтенә бердәм, аңлаешлы һәм ачык кагыйдәләр нигезендә түләнергә тиеш, югыйсә төбәкләр арасында укыту сыйфатында аерма туплана, педагогик кадрлар дефициты арта», — дип билгеләп үтте ул.
Хәзер укытучылар түбән хезмәт хакы алган төбәкләрдән китәләр, һәм анда белем сыйфаты төшә. «Болар барысы да балаларыбыз өчен белем бирү мөмкинлекләре тигезлегенең төп принцибын боза», — дип йомгаклады Владимир Путин.
Дәүләт Советы утырышы педагог һәм остазның ролен һәм абруен күтәрүгә багышланган. Анда Татарстан Республикасы Рәисе Рөстәм Миңнеханов та катнаша. Чара башланганчы, Россия Президенты Костромадан Никита Мирошниченкога шалтыратты, аның Эрмитажга бару хыялын ул «Теләкләр чыршысы» кысаларында тормышка ашырды.
